1۔ چونکہ دنیا آنکھوں کے سامنے ہے اور آخرت اوجھل، انسان فطری طور پر آنکھوں دیکھی حقیقت پر زیادہ اعتماد کرتا ہے۔ اس لیے دنیا کی محبت کا سب سے بڑا علاج یہ ہے کہ انسان آخرت پر پختہ ایمان لائے اور نبی ﷺ کی احادیث کو سچے دل سے قبول کرے ۔ ایسا یقین حاصل کرے کہ گویا آخرت آنکھوں کے سامنے ہو۔ قرآن و حدیث میں اکثر دنیا کے ذکر کے ساتھ آخرت کا بھی تذکرہ ملتا ہے تاکہ معلوم ہو کہ جب انسان کا ایمان آخرت پر مضبوط ہو گا تو وہ دنیا کی محبت سے بچا رہے گا۔ حسن بصری فرماتے ہیں : ” میں نے ایسے لوگ دیکھے ہیں کہ اگر تم انہیں دیکھتے تو پاگل سمجھتے ، اور اگر وہ تمہیں دیکھتے تو کہتے کہ ان لوگوں کو آخرت پر یقین نہیں ۔ ” جب ایمان مضبوط ہو تو دنیاوی مال سے الٹا نفرت ہونے لگتی ہے ۔ مال آنے پر انسان پریشان ہوتا ہے کہ کہیں میرا آخرت کا حصہ کم نہ ہو جائے ، جیسا کہ نبی ﷺ نے فرمایا : “آدم کا بیٹا موت کو نا پسند کرتا ہے ، حالانکہ موت مومن کے لیے فتنوں سے بہتر ہے ، اور مال کی کمی کو نا پسند کرتا ہے ، حالانکہ مال کی کمی قیامت کے دن حساب کو ہلکا کر دے گی ۔ “نیز ، ایک اور حدیث میں ہے کہ : ” فقیر مسلمان جنت میں مالداروں سے چالیس سال پہلے داخل ہوں گے ۔”